‘n Boer maak ‘n plan, dis ‘n waarheid daai.

Joe gaan by die nuwe fabriek in Cacuaco werk, en sodra die huise daar reg is, trek hy soontoe.  Die tyd raak min, en ek het sy plante begin regkry vir die groot trek.  Nie omdat ek so lief is vir hom nie, maar omdat ek die plante in die eerste plek vir hom gegee het!     (Mind you, ek dink tog ek het ‘n soft spot vir die man.  Hoe anders kry hy dit reg dat ek vir hom die groot hoodia en die groot cyphostemma gee, en ek is tevrede met die kleintjies?    )

In elk geval, hier sit ons nou in Angola sonder ‘n Green Africa Nursery of  ‘n Bundu Kwekery.  Mooi blombakke is skaars soos hoendertande.  In Shoprite kry mens ook net van die plastiek soort, en Joe se groot hoodia het iets beters vereis.  So, toe gaan ry ons bietjie rond, en op een van die asgate kry ons ‘n ou, geroeste drom. 

Ek het darem vooraf vir Joe gewys en hom ingelig oor my intensies, en hy was heel entoesiasties.  Oor die naweek het ons toe die hoodia uit sy liederlike wit, verweerde, onderste-deel-van-’n-drommetjie gehaal en oorgeplant in die befomfaaide drom. 

Vir my lyk dit nogal heel…anders?  LOL.  Joe het darem al vanoggend die klokkie gelui en gesê hy hou  daarvan!

Van Cacuaco gepraat, as, indien en wanneer ek eendag die tuinjob het, sal ek met ‘n vrag klein kremetartjies gaan.  Daar is mos geen ding wat skaduwee gooi nie.  Gister sien ek omtrent 20 klein kremetartjies wat in die grasperk opgekom het.  Ek het Miguel, wat altyd die grassnyer behartig, gevra om hulle te spaar as hy weer grassny.  Toe ek die eerste keer ‘n klein kremetart sien, kon ek nie glo dat so groot boom begin as niks meer as ‘n groen spriet nie.